Biau Nurun Belelang

Biau Nurun Belelang

“Sa, dua, tiga, empat, lima, enam, tu-u-joh !
Enda aku tulah miau ke selanjau manok pagah
Enda aku layu miau ka selanjau manok kelabu
Enda aku busong miau ka selanjau manok tuntong
Enda aku tumbang miau ka selanjau manok labang.

Laban kaki aku tu bediri
Di segi batu galang
Lengan aku gembar genteran
Sangkoh balang.
Pala aku tata lalu minyak kepayang,
Mulut aku ngetup lilup besi semang
Nyawa aku nguyu leka pelaga kemang

Aku tu ga ukai muntang
Ukai nengkebang
Aku endang bisi utai ditunda
Utai diselada
Aku tu baka ira tampong tali
Baka rutan tampong wi
Aku tu ga nampong pengawa tuai lama
Nampong kelulu tuai dulu.

Aku tu deka nunggah sida
Ke lama udah tumpah
Tinggang ka tebelian wi.
Aku deka negu sida
Ke lama udah layu
Tingang temuku tabu tali.

Aku tu ga deka ngangkat
Ka sida ke lama udah lenyap
Tinggang urat dandi laki.
Aku tu ga deka nelai sida
Ka lama udah sulai
Tinggang seregu rau rangkai
Keranjai indai imbok kadidi.

Laban perengka kami tu chukop kira
Asi kami tu udah chukop anti
Penganan kami tu udah chukop raban
Letup kami udah chukop tangkup
Piring kami tu udah chukop ading.

Tu ga kena kami minta
Kena kami nanya
Kena ensurok kena nundok
Kena minta jekat minta niat
Pinta peda pinta tengkila
Pinta iching pinta perening.

Kami tu ga bisi pengawa bisi kereja
Laban Wat Lamba tu
Deka bejalai ka menoa bukai
Deka pegi ka nengeri
Iya ke pegi tu ukai pegi pia
Ukai pegi ngapa
Iya tu ga deka ngiga penemu
Ngiga penau
Bisi pejalai ngiga pemandai.

Nya alai kami tu
Chukop padah, chukop sembah
Minta kita meda, minta kita nengkila
Minta kita nyukong, minta kita nulong
Minta kita ngemata, minta kita nyaga iya
Minta kita ngadu, minta kita kita ngintu iya
Lak ka iya tau lantang tau senang
Tau gerai tau nyamai, gayu guru
Pulai kitu baru ila mai ka kami
Tuah limpah, mai pemandai mai penemu.”

Jako Ajar Lalau Pengidup

Anang ketawa ka sarang burong puna
Taja iya semina
Ensara lambar rangkang.
Anang kelalu muji
Sarang burong kanji
Taja iya tuchi kapas magang.
Anang bejai jani
Meda iya mandi di ai
Pelangkan belang
Anang ketawa ka tekura
Meda iya gama-gama
Bejalai ragang-ragang
Anang mantah tingkah
Enti iya endang tebiang.
Anang bejai menoa ili
Meda pantai magang.
Anang ngumbai nyamok gaok
Meda iya mantang darah orang
Anang ngumbai singa gila
Enti meda iya ngipa
Di seraka jalai ulang.

Enti tindok bepanggal ka pengingat
Enti bejalai betungkat ka adat,
Enti diau bebekal ke penelap enggau pekat.

Enti lantang bepegai ka basa
Enti tusah bepanggai ba Petara.

Pagi bejalai ngiga pemakai
Enti udah bulih pulai lemai
Anang enda ingat ka penatai diri
Ari apai indai.

PENDIAU ENGGAU PENGIDUP DI MENUA PESISIR

Ngaga Reringkap Kena Ngulih Ka Jelu Babas

Ngenan Reringkap

Ngerurut Daun Ubi

Perengka Enggau Atur Piring

Pelajar Sekula

Senjata ti pemadu beguna dikena kitai bansa ngemansang ka diri ba dunya diatu ianya pelajar sekula. Nadai pelajar sekula dia kitai bansa lalu deka tinggal di belakang belama lalu senang amat dikemeli sereta dikelemi ka bala bukai ti deka beambi ulih ba pendiau kitai ti seranta.

 Ambi ka banding maia ka bepilih tu kemari kena 16.04.2011, dia aku bisi merati ka pengawa kitai bansa kelebih agi ia ka diau di menua pesisir, senang amat dikemeli ka sekeda ari parti politik maia ka bekimpin nginti undi. Kitai dayak tu murah amat rega dibeli orang, dianjung ka orang ai beer, arak langkau, sardine,mi maggi enggau maioh agi ia ka bukai lalu nagsuh kitai bepuasati enggau utai nya tadi. Udah nya runding lalu tepawah enda ngira utai ka dudi ari ila ia ka ngenusah diriempu ketegal taju remaung nya tadi.

Pemutus pengawa bepilih tu kemari ba rampa ia ka dipeda aku endang ukai sukong ti tuci ari rakyat sarawak, tang ketegal amu mata ketegal utai ka dua tiga ringgit nya tadi. Dini enda senang orang ka beambi ulih ngiga pengaya ba bansa kitai. Sida ka dipilih nya  nyamai meh laban kitai ka ngundi meri ia kuasa lalu ia ketawa dalam ati naka pengaga. Nya sepi sida iya udah dikemeli ka jako aku ko ia, Kitai mina ngaru pala pepeli mata napi pemerinsa ari runding kitai ka pandak. Nyesal dudi nadai reti, nganti meh kitai lima taun agi minta sapi orang baru. Kasih amat ku meda kitai dayak.